कामगारांच्या हक्काचा मशालवाहक —अमन अंधेवार
रक्तदान, आरोग्य तपासणी, अन्नदान, शालेय साहित्य वाटप अशा सेवाकार्यांनी जिल्ह्यात साजरा झाला कामगार नेत्याचा वाढदिवस
AMC24 News. मुख्य संपादक
अरविंद चाहादे घुग्घूस 9405714165
- चंद्रपूर | कामगारांच्या हक्कासाठी आक्रमक लढा देणाऱ्या महाराष्ट्र नवनिर्माण कामगार सेनेचे जिल्हाध्यक्ष अमन अंधेवार यांनी अल्पावधीतच चंद्रपूर जिल्ह्याच्या औद्योगिक क्षेत्रात नवी क्रांती घडवून आणली आहे. अन्याय, शोषण आणि दुर्लक्षाच्या चक्रात अडकलेल्या शेकडो कामगारांना न्याय मिळवून देत त्यांनी आपल्या नेतृत्वाला जनतेच्या मनात एक भक्कम स्थान निर्माण केले आहे. उद्योग प्रशासन, कंत्राटदार आणि व्यवस्थापन यांच्या दडपशाहीविरोधात उभे राहत अंधेवार यांनी कामगारांचा आवाज सत्तेच्या दरबारापर्यंत पोहोचवला, आणि हीच जाज्वल्य भूमिका आता त्यांना जनतेत “कामगार हक्कांचा मशालवाहक” ही ओळख मिळवून देत आहे.
याच भूमिकेची साक्ष देत, त्यांच्या वाढदिवसाचे औचित्य यंदा केवळ उत्सवापुरते मर्यादित न ठेवता, तो ‘सेवा दिवस’ म्हणून साजरा करण्यात आला. जिल्ह्यातील विविध तालुक्यांमध्ये रक्तदान शिबिरे, मोफत आरोग्य तपासणी, अन्नदान, रुग्णांना फळांचे वाटप, शालेय पुस्तकांचे वितरण आणि चुंबकीय किट वाटप अशा जनहितकारी उपक्रमांनी हा दिवस लोककल्याणाच्या रंगात रंगवला गेला. सामाजिक बांधिलकीची आणि लोकसेवेची प्रचिती देणाऱ्या या उपक्रमांनी, नेत्याचा वाढदिवस एका अभूतपूर्व जनआंदोलनासारखा दिसून आला.
चंद्रपूर शहरातील तुकूम परिसरात खेडुले समाज सभागृहात आयोजित भव्य रक्तदान शिबिरात शेकडोहून अधिक कार्यकर्त्यांनी रक्तदान केले. तसेच, आरोग्य रोग निदान शिबिरात ३६० हून अधिक रुग्णांची तपासणी करून त्यांना चुंबकीय किट वाटप करण्यात आली. या किटमुळे स्नायू व हाडांच्या वेदना कमी करण्यास मदत होते, आणि हा उपक्रम विशेषतः ज्येष्ठ नागरिक व श्रमिकांसाठी दिलासा देणारा ठरला.
बल्लारपूर, जुनोना, तसेच ग्रामीण भागातील अनेक ठिकाणी कार्यकर्त्यांनी आरोग्य शिबिरे, अन्नदान आणि विद्यार्थ्यांना शालेय साहित्य वाटपाचे उपक्रम राबवले. जिल्हाभर झालेल्या या उपक्रमांनी केवळ अमन अंधेवार यांच्या नेतृत्वाला सलाम केला नाही, तर मनसे कामगार सेनेच्या सामाजिक कार्याला नवे बळ दिले.
या सेवाकार्यपूर्ण वाढदिवस सोहळ्यास महाराष्ट्र नवनिर्माण सेनेचे जिल्हा उपाध्यक्ष राजू कुकडे, वाहतूक सेना जिल्हाध्यक्ष महेश वासलवार, विधी विभाग जिल्हाध्यक्ष अजित पांडे, जनहित जिल्हाध्यक्ष रमेश काळाबांधे, रोजगार व स्वयंरोजगार जिल्हाध्यक्ष मनोज तांबेकर, तसेच पियुष धुपे, विजय तूरक्याल, वर्षा भोंबले आणि इतर मान्यवरांसह शेकडो कार्यकर्त्यांची उपस्थिती होती. महाराष्ट्र सैनिक व विविध क्षेत्रातील कार्यकर्त्यांनी उपस्थित राहून कामगार चळवळीच्या या नेतृत्वाला कृतज्ञतेचा मान दिला.
अमन अंधेवार यांचा वाढदिवस हा केवळ वैयक्तिक उत्सव न राहता, जिल्ह्यातील असंख्य कामगार आणि सामान्य नागरिकांसाठी आशेचा आणि प्रेरणेचा दिवस बनला आहे. त्यांच्या नेतृत्वाखाली कामगार हक्कांसाठी सुरू असलेला संघर्ष आणि समाजोपयोगी कार्याची परंपरा, पुढेही जिल्ह्याच्या जनतेला बळ देत राहील, हेच या सेवा दिवसाच्या यशातून स्पष्ट झाले.
