ब्रह्मपुरीत धक्कादायक आरोप! परवानग्यांशिवाय उपचार, शस्त्रक्रिया आणि प्रसूती सेवा सुरू असल्याचा दावा
ब्रह्मपुरी | प्रतिनिधी।
अमित कणाके
AMC24 News 📰 🗞️
ब्रह्मपुरी १५/७/२०२६
शहरातील नव्याने सुरू झालेल्या लोटस हॉस्पिटल संदर्भात गंभीर आरोप समोर आले आहेत. उपलब्ध आरोपांनुसार, आवश्यक वैद्यकीय परवानग्या नसतानाही रुग्णांना दाखल करणे, शस्त्रक्रिया करणे तसेच प्रसूतीगृहाची परवानगी नसतानाही डिलिव्हरी आणि सिझेरियन शस्त्रक्रिया केल्या जात असल्याचा दावा करण्यात आला आहे.
याशिवाय, ऑपरेशन थिएटरसाठी आवश्यक परवानगी नसतानाही ऑपरेशन थिएटर सुरू असल्याचाही आरोप करण्यात आला आहे. हे आरोप खरे ठरल्यास रुग्णांच्या जीवाशी गंभीर स्वरूपाचा खेळ होत असल्याची चिंता व्यक्त केली जात आहे.
तसेच, रुग्णांकडून उपचारांच्या नावाखाली अवाढव्य बिले आकारली जात असल्याचा आणि रुग्णालयाची इमारतही संबंधित नियमांनुसार नसल्याचा आरोप करण्यात आला आहे. काही अधिकाऱ्यांना “मॅनेज” करून हे सर्व सुरू असल्याचाही दावा करण्यात आला असून, या संपूर्ण प्रकरणाची सखोल चौकशी करण्याची मागणी नागरिकांकडून होत आहे.
या सर्व आरोपांची सत्यता संबंधित शासकीय यंत्रणांनी निष्पक्ष चौकशीद्वारे पडताळणे आवश्यक आहे. आरोप सिद्ध झाल्यास संबंधितांवर कठोर कारवाई करण्यात यावी, अशी मागणी ब्रह्मपुरीतील नागरिकांकडून होत आहे.
वरील सर्व बाबी या आरोपांवर आधारित आहेत. संबंधित रुग्णालय किंवा प्रशासनाची अधिकृत भूमिका अद्याप समोर आलेली नाही. निष्पक्ष चौकशीनंतरच वस्तुस्थिती स्पष्ट होईल.
