गुन्हे शाखेची धडाकेबाज कारवाई : विधीसंघर्षित बालकाच्या ताब्यातून १ लाखाचा मुद्देमाल हस्तगत
AMC24 News
October 19, 2025
चंद्रपूर :
शहरातील बिनबा गेट परिसरात संशयास्पदरीत्या फिरत असलेल्या अल्पवयीन चोरट्याला स्थानिक गुन्हे शाखेच्या पथकाने तात्काळ कारवाई करून पकडले. त्याच्या अंगझडतीत पोलिसांना सोन्याच्या दोन अंगठ्या मिळाल्या असून, या अंगठ्या घुटकाळा वॉर्ड येथील एका घरफोडीतील असल्याचे उघड झाले आहे.
शुक्रवारी (१७ ऑक्टोबर) रात्री स्थानिक गुन्हे शाखेचे पथक चंद्रपूर शहरात गस्त घालत असताना गोपनीय सूत्रांकडून माहिती मिळाली की, बिनबा गेट शांतीधाम परिसरात एक इसम संशयास्पदरीत्या फिरत आहे. तत्काळ कारवाई करत पथकाने त्या इसमास ताब्यात घेतले असता तो विधीसंघर्षित बालक असल्याचे समोर आले.
पंचासमक्ष अंगझडती घेतल्यावर त्याच्याकडून सोन्याच्या दोन अंगठ्या (अंदाजे किंमत ₹१ लाख) मिळून आल्या. विचारपूस केली असता त्याने घुटकाळा वॉर्ड परिसरात घरफोडी केल्याची कबुली दिली.
सदर मुद्देमाल पंचासमक्ष जप्त करून पुढील तपासासाठी बालक व जप्त सोन्याचा माल पोलीस स्टेशन चंद्रपूर शहर येथे हस्तांतरित करण्यात आला आहे.
उघडकीस आलेला गुन्हा:
पो. स्टे. चंद्रपूर शहर
गु. र. क्र. 754/2025
कलम 305(a), 331(3), 331(4) भारतीय न्याय संहिता 2023
जप्त मुद्देमाल:
सोन्याच्या दोन अंगठ्या — एकूण किंमत ₹१,००,०००/-
ही कारवाई स्थानिक गुन्हे शाखा, चंद्रपूर अंतर्गत उपविभाग चिमूर पथकाने केली असून, त्यांच्या तत्परतेमुळे आणखी काही घरफोडी प्रकरणे उघडकीस येण्याची शक्यता पोलिसांनी वर्तविली आहे.
